尋日沙田日馬，係好Typical 我哋公開預測結果個Model表現比較穩定嘅場合，命中率本身估計都會高，所以我自己都有試下每場都買單注單T同4連環賺返下AI Cloud Platform 月費，結果中一場單T同兩場四連環，回報率超過一倍其實都比我預計好好多。
不過睇埋網友跟我數據買原來重贏得多，我都只能繼續認輸…
又係教我用N+1方法嘅網友，其實我一路都唔同意佢用我呢個Model去玩N+1係會有長期回報，我認為買返單式比較合理。原因係我而家呢個Model 唔係捉冷馬或搵啲被公眾低估(即係值搏)嘅馬，用呢個Model 賺到嘅水位就係AI分析同大數據記性比大眾用人腦分析差距優勢，個差距其實本身唔會非常大，又而且我地之外都一樣有好多人用緊AI，佢地重好可能比我地資源數據更優勝。重有賭馬係零和遊戲，馬會又會抽埋水先派彩 （例如單T馬會會扣起23％彩池），所以用AI最後個Edge 已經唔會大。要從呢少少Edge中賺錢，下注要非常有效率。用N+1方法買單T要4注，就算嬴都要輸3注，同埋4注入面賠率分別有時會幾大，應該用啲更有效率方法分配注碼，例如用凱利公式 (Kelly criterion) 去買。但點知佢一場又收左$4,920，其他果幾場我都唔想再理佢中幾多喇。
不過佢連續幾日都有好回報率，我都係認輸，唔再教人賭馬，我都係專心攪返AI算。
另外之前提嘅潘頓難預測研究都有結果喇，可以睇呢條LINK：